पहिचान पुरस्कार कोषले वरिष्ठ कवि बैरागी काइँलालाई ‘पहिचान सम्मान’ दिने भएको छ । प्रत्येक पाँच वर्षमा दिइने यो पहिचान सम्मान यसपटक कवि, मुन्धुमविद एवम् नेपाल प्रज्ञा प्रतिष्ठानका पूर्व कुलपति काइँलालाई प्रदान गरिने भएको छ । सम्मानको राशी ५ लाख दुई हजार दुई रुपैयाँ र ताम्रपत्र रहेको छ ।
त्यस्तै पहिलोपटक घोषणा गरिएको ‘पहिचान युवा सम्मान’ पहिलोपटक कवि, राजनीतिक अभियन्ता गणेश कुमार राई (गिलु रातोस) लाई प्रदान गरिने भएको छ । युवा सम्मानको राशी ५० हजार दुई सय दुई रुपैयाँ छ र ताम्रपत्र रहेको पहिचान पुरस्कार कोषले जनाएको छ ।
पहिचान पुरस्कार कोषका संस्थापक काङमाङ नरेश राईका अनुसार प्रत्येक वर्ष पुस्तकलाई दिइँदै आएको पहिचान पुरस्कार यस वर्ष होल्ड गर्दै पहिचानको मुद्दामा योगदान दिने अग्रज र युवालाई सम्मान स्वरूप दुई पुरस्कार एकैसाथ घोषणा गरिएको हो ।
यसअघि खगेन्द्र सङ्ग्रौलालाई पहिचान सम्मान दिइएको थियो ।
