नेपाली कला र साहित्यलाई केन्द्रमा राखेर लण्डनस्थित युनिभर्सल पिस फेडेरेसनको हलमा तीन दिने ‘प्यालेट र प्रोज’ नामक एक रोचक कार्यक्रम सम्पन्न भएको छ । जसमा दुईजना कलाकारको कला प्रदर्शनी र एक कथाकारको कथासङ्ग्रह एउटै हलमा सार्वजनिक गरियो ।
पहिलो दिन कलाकार पी. सिंह र रोस्लिन सिंहको मनमोहक कलाकृतिहरू प्रदर्शन गरिएको थियो । यसपछि साहित्यकार डा. संगीता स्वेच्छाको अंग्रेजी कथासङ्ग्रह ‘रोजेज ओडिसी’ (Rose’s Odyssey) सार्वजनिक गरिएको थियो ।
कार्यक्रममा बोल्दै ‘युनिभर्सल पिस फेडेरेसन, युके’का निर्देशक मार्गारेट अलि तथा महासचिव रबिन मार्शले सांस्कृतिक आदान-प्रदानको महत्त्वलाई जोड दिँदै नेपाली कला र साहित्यलाई प्रदर्शन गर्ने मञ्च उपलब्ध गराउन पाएकोमा खुशी व्यक्त गरे ।
कार्यक्रममा दुई कलाकार पी. सिंह र रोस्लिन सिंहका मनमोहक कलाकृतिले नेपालको विविध परिदृश्य र वास्तुकलालाई समेटेको थियो । नेपाल चिनाउने कलाकृति अवलोकन गरेपछि यी दुई कलाकारको धेरैले प्रशंसा गरेका थिए ।
उक्त कार्यक्रममा युनिभर्सल पिस फेडेरेसन युकेका महासचिव रोबिन मार्स, लेखक डा. रुपक श्रेष्ठ, प्यालेस्टिनी कवि शाहद महानवी, बेलायेति लेखक डा. सायन ह्यारिस, अन्तर्राष्ट्रिय टिभी प्रसारक इयान पेल्हम टर्नर र संगीता स्वेच्छाले संयुक्त रूपमा कथासङ्ग्रह रोजेज ओडिसी सार्वजनिक गरेका थिए ।
जयन्त शर्माले अंग्रेजीमा अनुवाद गरेको कथासङ्ग्रह रोजेज ओडिसी यसअघि सन् २०१९ मा ‘गुलाफसँगको प्रेम’ शिर्षकमा नेपाली भाषामा प्रकाशित भएको थियो । साथै साहित्यकार स्वेच्छाको ‘सेतो सिउँदो’ उपन्यास चर्चित छ । दुवै कलाकार पी. सिंह र रोस्लिन सिंह तथा संगीता स्वेच्छा युके बस्दै आएका छन् ।
