सेन्टर फर नेपाल स्टडिज युकेको (सिएनएस युके) वार्षिक समर–भेला सटनको मिचाममा सम्पन्न भएको छ । भेलाले आगामी वर्ष संस्थाको बिसौं वार्षिकोत्सव मनाउने तथा नेपालसँग जोडिएका विषयमा क्रमश: थप अनुसन्धानमूलक प्रकाशनहरू गर्दै जाने निर्णय गरेको छ ।
भेलाले सुरुमा भर्खरै निधन भएका नागरिक अगुवा तथा मानवअधिकारकर्मी डा. देवेन्द्रराज पाण्डेलाई सम्झिँदै श्रद्धाञ्जली व्यक्त गरेको थियो । यसपछि भएको छलफलमा बोल्दै संस्थाका कार्यकारी निर्देशक लोकेन्द्र ढकालले नेपाल–डाइलग वेबिनारलाई अझ सहभागितामूलक तथा विषयकेन्द्रित बनाइने बताए । सोहीअनुसार गोर्खा पेन्सन तथा समान अधिकार आन्दोलन र बैठकमा भएका पछिल्ला उपलब्धीमाथि केही महिनामा नै एक वेभिनार गर्ने तयारी गरेको छ ।
‘डेढ वर्षयता नेपाल डायलगमा सहभागी वक्ता तथा स्रोताहरूलाई विशेष धन्यवाद व्यक्त गर्दछौं’ ढकालले भने, ‘आगामी दिनमा अझै सघन छलफल हुनेगरी नेपाली डायस्पोरा र समसामयिक मुद्दामा रहेर वेबिनार गर्नेछौं, जसमा जुममार्फत् लाइभ जोडिन सबै विद्यार्थी, पेशाकर्मी र आम नागरिकलाई आह्वान गर्दछौँ ।’
सिएनएस युकेले सन् २०२५ देखि प्रत्येक महिनाको पहिलो शनिबार युके समय दश बजे, नेपाल डाइलग वेबिनार (Nepal Dialogue UK: Monthly Webinar Series) गर्दै आएको छ । यस्तै बेलायत आउने पहिलो नेपाली मोतिलाल सिंहको नाममा स्थापना गरिएको ‘मोतिलाल फेलोसिप’ नेपालमा एमफिल गर्ने एकजना विद्यार्थीलाई वार्षिक रूपमा प्रदान गर्दै आएको छ ।
मिनी–पुस्तक प्रदर्शनीसहित गरिएको समर–भेलाको संयोजन सिएनएस युकेकी रिसर्च एसोसियट डा. सुष्मा बस्नेतले गरेकी थिइन् । बस्नेतले संस्थाको प्रतिनिधित्व गर्दै गत जुनमा ब्रिटिस नेपाल एकेडेमिक काउन्सिलले गरेको ‘नेपाल अध्ययन दिवसमा कार्यपत्र प्रस्तुत गरेकी थिइन् ।
सन् २००७ मा स्थापना गरिएको सिएनएस युकेले आगामी वर्ष अन्तर्क्रिया, सेमिनार तथा अनुसन्धानमूलक ग्रन्थ प्रकाशन गरी बिसौँ वार्षिकोत्सव मनाउने तयारी पनि गरिरहेको छ । संस्थाले दुई दर्जभन्दा बढी अनुसन्धानमूलक ग्रन्थ, जर्नल, न्युजलेटर र युकेमा रहेका नेपालीहरूको पहिलो जनगणना गरी पुस्तक प्रकाशन गरेको छ ।
समर–भेलामा संस्थाका प्रमुख अनुसन्धानकर्ता डा. कृष्ण अधिकारी, संस्थापक सल्लाहकार प्रा. डेभिड गेल्नर, डा. गंगाराम दाहाल, एलएन पाण्डे, डा. सङ्गिता श्रेष्ठ, कृष्ण उपाध्यायलगायत सहभागी थिए ।
