पहिचान पुरस्कार २०८० को लागि उत्कृष्ट आठ पुस्तकको सूची सार्वजनिक भएको छ। ‘पहिचान पुरस्कार कोष’को मंगलबार बसेको बैठकले कोषमा दर्ता भएका पुस्तकमध्येबाट उत्कृष्ट आठ कृतिको छनोट गरेको हो।
निर्भीकजंग रायमाझीको ‘त्यसरी त कहिल्यै सोचिएन’, गीलु रातोसको ‘सिलीदुङ’, विश्व कुइकेलको ‘गोपीचा’, मिथोचको ‘आगोको पिदार’ र राजु स्याङ्तानको ‘ओ पेङ्दोर्जे’ उत्कृष्ट आठको सूचीमा परेका छन्। त्यस्तै, प्रवीण खालिङको ‘चिया गफ’, अभागी थेगुवाको ‘सपनाहरूको बही’ र श्याम सामसोहाङ राईको ‘मुन्दुम ट्रेल’ पनि सूचीमा समावेश छन्।
२०८० / २०८१ सालभित्र प्रकाशित भई कोषमा दर्ता भएका पुस्तकमध्येबाट उत्कृष्ट आठ कृति छनोट गरिएको कोषका संस्थापक नरेश काङमाङ राईले बताए। गत वर्ष प्रकाश गुरागाईंको किताब ‘जङ्क्सन पिपलबोट’ र प्रगति राईको उपन्यास ‘थाङ्ग्रा’ले संयुक्त रूपमा पहिचान पुरस्कार प्राप्त गरेका थिए।
पहिचान पुरस्कारको राशी ४ लाख २ हजार २ रुपैयाँ रहेको छ । यसभन्दा अगाडि ११ वटा कृतिले पहिचान पुरस्कार प्राप्त गरेको छ भने पहिचान सम्मानबाट लेखक तथा राजनीतिक विश्लेषक खगेन्द्र संग्रौला सम्मानित भइसकेका छन् ।
